ديوان حلول البطالة - نبي نخلي كشخة الثوب والكوت

ياسعود انا فكرت في موقف الموت=موقف عظيم وكلنا واردينه

نبي نخلي كشخة الثوب والكوت=ونبدله في خامةٍ قايسينه

عقب المجالس وازرق العود وبشوت=الدود ربّع بالكتوف السمينه

ماينفع الصّياح لو زج بالصوت=ولايانفع الرحال ياكود دينه

من فاز في دينه غدى اليوم مبخوت=والهالك اللي مايمرغ جبينه

وقت السحر صلى قبل فايت الفوت=وقام يتوسل بالدموع الحزينه

يالله يامنجي دخيله من الحوت=يوم التجى لك في دعاه...اونينه

ياناصر عبده على جند جالوت=وأفرغت صبرك للجنود وسكينه

وارسلت موسى بالبحر فوق تابوت=وعلمت نوح ٍ... كيف يبني سفينة

ياواهبٍ في بابل السِحر... هاروت=وأعطيت موسى المعجزة في يمينه

تغفرلي الزله اذا فِلت النوت=يوم يتبرى والدٍ .... عن جنينه