للشاعر : يحيى بن شيبان
فتش بالحشا فتش لكن خف بالتفتيش=غيرك ما ملك قلبي وأحكم كل بيبانه
سوّ اللي تبي سوّه مدري كم معاك اعيش=يوم إن حالتي دونك صارت حيل تعبانه
شوف الشوق يا غالي خلا صاحبك درويش=باع الورد وما يملك صفى كل بستانه
كم ضحيت لعيونك لكن طوّل التهميش=أبني الصرح لك منصح وتجي تهدم اركانه
الا ياليت فيه قاضي يقبل ياخذ البخشيش=قاضي بالهوى يحكم نقبل حكم ميزانه
سقى الله زمانن فات يوم الحمل حمل الريش=يوم الهايم المغرم نادر تسهر اجفانه
تكفى لا تصد تكفى تبدي حالة التطنيش=قلبي ما بغاك الا انت عايف كل خلانه
إرحم حالة اللي عاش فكره صابه التشويش=رغم اللي حصل منك عاجز ينطق لسانه
إنت اللي ملك قلبي وانت الجيش والشاويش=إنت الغازي إنت اللي مابغى اشوف جثمانه
تجذبني وتبعدني وأدري ذي سنين الطيش=لكن وردنا يذبل ودي تسقي اغصانه
رسمتك يالغلا رسمة صورة مابها تغبيش=ما هي رسم دافنشي يومن تبدع الوانه
اشوف الموت بغيابك يقبل مشيته بشويش=وكن السيف والسياف ساق الموت و أكفانه