جابت العيد

[الديوان]

 
هذا امتحان الله قبل ليلة العيد=حاولت اصد ولا قويت الصدودي

اللي عليّ مرت ترى جابت العيد=عندي على هرجي ثبوت وشهودي

اللي على ريناد في حسنها تزيد=الا حسنها قد تعدى الحدودي

ضيعت ما عندي وانا ضعت بالصيد=منها نشف ريقي ولا من صمودي

اللي عليها الجيد يا مدة الجيد=ورموشها كنها صفوف الجنودي

ما رفت بي وش فيك يا سيد الغيد=كن الهوى عندك بليا بنودي

اسرفت بي من دون قيد وترشيد=كني فلسطيني بيدين اليهودي

بطشت بي بطش الجنود الصناديد=اللي غزو عدوانهم بالحدودي

اشعلت بي نار ٍ ومنها تناهيد=كل ما تجاهلها تبيها تزودي

تطلق صواريخك علينا بطربيد=نسمع لها صوتٍ سواة الرعودي

احس في قلبي احاسيسي تزيد=ويلعب بي الخفاق وقت السجودي

من شاعر ٍ شاف المعاناة تجسيد=عبر الافق ولا بشكل ٍ عمودي

حاولت اهونها ولكنها تزيد=من الظما صعب ٍ نبل ّ الكبودي

جردت من قلبي التصاريف تجريد=امشي وكني تايه ٍ بالنفودي

قرم ٍ شجاع ومنكم صرت رعديد=وأصبح يخوفني هزيم الرعودي

تكفى تجمل لا يجي منك تهديد=ابغى العهد منك وصدق الوعودي

العهد يبغى له مع الوقت تجديد=ولا تمد ّ الوصل كانك تجودي

النار فيني كل ماشفتك تزيد=ودي بعيد الله تخف القيودي

ودي اغرد وارسل الصوت تغريد=ولا مع ساعي البريد الطرودي

اشرح معاناتي لبعض الاجاويد=اللي عن المضيوم دايم تذودي

هذا الكلام ولا يبي زود توكيد=نكره تراديد الحكي والردودي




الشاعر : يحيى بن شيبان

قناة الشاعر على التيك توك
https://www.tiktok.com/@shiban84