أمر الولي ما فيه نقض وتأخير

[الديوان]

 للشاعر : محمد إبراهيم بن صقر السياري


شمس الخميس العصر ما غابت بخير=جرت على صدري هموم وعزاري

تنادبتني مسرجات ومغاوير=وداست على قلبي بروس المباري

تمازعت قلبي بضرب وتعزير=ليما غدا لي من ندبها هذاري

فرقاك يا بونا تهد المزابير=وان جت على طويق الشمال المباري

وان جت على ثهلان وان جت على النير=تبددت وامست رسوم وصحاري

أمر الولي ما فيه نقض وتأخير=ما قدر المولى على العبد جاري

يا خشوم خرشا النايفات الظواهير=تزحزحي ما عاد لي فيك طاري

وذيك المجالس والقبب والتصاوير=طقي حدادك واعلنيها طواري

ما دام خيالك توقف به السير=وشقت عليه من النياح الصداري

ومكابد العبرات سد الحناجير=وجدع غداف واتبعتها غتاري

والراي من بعدك غدا فيه تقصير=وانته من أول مسندي في قراري

ابوي وان ضامك هموم ومقادير=حلل عقدها صادق ما يداري

ابوي وان عدو قروم ونوادير=عده من الهامات هي والمناري

وجماعتك اهل الوجيه المسافير=تشهد على قولي ولاني اماري

يبذل بماله ما يهاب المخاسير=ما خاف من قولة توق وحذاري

في جنة الفردوس روض مزاهير=يالله طلبتك لا حشرنا عواري

وتشوف أخوك اللي خذته المقادير=اللي على فقده زعجت العباري

هو عمنا ناصر سليل المناصير=لبيوت ربه بالعطا ما يداري

ستة شهور بينهم يا المناعير=وفراقهم ما ينحسب له بطاري

بالعز عاشوها حرار ونوادير=متقاسمين حلوها والمراري

حصد المنايا وان حسبنا مخاسير=تأخذ على وضح النقاء والغداري

وصلاة ربي عد نبت النواوير=على النبي ما ذعذعت في الخباري