يا الله ياوالي على كل والي .. ياخير من يدعى لكشف الجليله
المالك المعبود محصي الرمالي .. الكون والدنيا ومابه فهي له
ما كان به أول وماكان تالي .. ملكه يدَيّر به على مايجي له
يمضي ويقضي قادر مايبالي .. والخلق ما تفعل بلا أمره فعيله
ماله شريك جل فوق متعالي .. علمه أحاط بدقته والجليله
اشهد فلا غيره إله ِولالي .. ربٍّ سواه أخشاه وأرجي لنيله
ياواحد فوق السموات عالي .. من سطوته كل الخلايق ذليله
يافارج الشدة بضيق الحوالي .. إفرج لعبدك يامنجي خليله
وإنظر بعينك يابا الأفراج حالي .. فرد غريب والمصاغي قليله
وحيد مالي غير ظلك ظلالي .. ذليل مالي غير عزك وسيله
ياراحم إرحم شيبتي وانخذالي .. ياجابر أجبر عثرتي والفشيله
وألطف وناظر يالولي في سؤالي .. لاتواخذن فيما مضا من فعيله
لاأخوان لاعمان لامن خوالي .. ولامن صديق ٍبالورى نشتكيله
لو كان مايجلى سواء الله جالي .. ما شفت عبد ٍهرجته لي جميله
تقطعت وذم العرى والمدالي .. من جملة الخلان والمستخيله
وقضيت من المخلوق ماحد بقالي .. إلا أنت يالي ما يخلي عميله
عادوني كل الناس شرق وشمالي .. ولا بقا غيرك ذراً التجي له
شافون مذلــــــول وحيد لحالي .. ولا لي من الفزعات مومي شليله
وأنا بعــــون الله امتانٍ حبالي .. متجود بحبـــال منشي المخيله
لو كان كلٍّ له صديق اموالي .. اقراب واخـــــــوان وعزوة قبيله
أنا لي اللّي زابنه مايسالي .. جزل العطا مبري الجسوم العليله
اليا دعوا حبانهم فــــــزّ بالي .. رفعت طرفي له وقمت اشتكي له
وإلى تنادوا بينهـــــــم للّنوالي .. ناديت باسمــــك يامنجي دخيله
ومن لاذبك ماصار بالضيق تالي .. يصير الاول لو اعظامه هزيله
أنا دخيلك ياعزيز الجلالي .. حاشا كرم جـــــــودك يضيع عميله
بريت من غيرك بحالي ومالي .. وزبنت أنا بحماك عن كل ميله
من شر خلقك لايذبك ولالي .. لغيرك ملاذ شام،،،،خ ينعني له
يارب مالي غير جدواك والي .. وان كان خليتن فلالي عقيله
يا عالم بالمخطية والعدالي .. تشوف مالي غير عدلك وسيله
فلا تواخذني بماضي افعالي .. يا ساتر العورات مضفي جميله
لو كان ذنبي راجح بالجبالي .. عفوك عظيم ليس ذنبي عديله
أطلبك تقبل توبتي عن خمالي .. وأطلبك عني كل كرب تزيله
وأطلبك تغفرلي وتصلح اعمالي .. يا مزبن الخايف إلى باد حيله
مولاي لامنجـــــــا ولا ملتجالي .. إلا انت ياللي مايذيـــــر نزيله
يافزعت المظلوم منشي الخيالي .. يا فارج الشدات لو هي ثقيله
أفرج لمن بالحبس دونه رجالي .. وابواب واقفال واحصون طويله
في وسط دباب غريب لحالي .. أظلم ولادري وش نهــــاره وليله
متروك مالي من يرد المقالي .. لاحد يبي قولي ولا أحــــد يشيله
ولا واحد غيرك عليه إتكالي .. إلا انت يامنجـــــي دريك الدبيله
مادام تنظرلي وتسمع مقالي .. ماخــــــاب عبد يدري انك وكيله
ياسامع بالليل حس النمالي .. وتصويت يونس بالبحور الطويله
الماء وضرب الموج مثل الجبالي .. فوقه أجيبت دعوته وتهليله
يامصرف الأيام هي واليالي .. في قولته يجري القلم بتعديله
ادعوك باسماك العظام الجزالي .. وبحق ماخصيت لك من فضيله
وبحق عظمة قدرتك والجلالي .. وبحق نورك والفعال الجميله
وبحق مانزلته اول وتالي .. تجيرني من شر خلقك طويله
وتزيل كربات علينا ثقالي .. تغطلست مالي سوا الله دليله
آمن على قلب يجتول بجتوالي .. يا مسكن الروعات سكن جفيله
أسرع علينا يا قريب النوالي .. لا تجعـــــل الشدة علينا طويله
يافارج الكربة بضيق الحوالي .. أومر لعبدك بالفرج وتعجيله
وإجل الأمور المعضلة والجلالي .. عني وكل عبد مسلمٍ يندعي له
وصلاة ربي عد رمل السهالي .. على نبي وضـــــــــح الله دليله
صفوة قريش اللي مشى بالعدالي .. نبينا المعصوم عن كل ميله
يالله يا والي على كل والي ( توبة العوني )
العرض العادي
