الآدمي

[الديوان]

للشاعر : سعد بن جدلان


يالله ياحامل مفاتيح الارزاق=المعتني في رزق نفس خلقها

عن الخفايا ما على عينك رواق=واذنك عن الاسرار ماهي بصقها

تجعل نفسي من غضب وجهك اعتاق=وبيديك علق الامور ووفقها

اغسل قلوب اهل التباغض والاشقاق=وهون مسالبها وريح شفقها

سبة مروجة النمايم بالاسواق=اللي ما يملى الناس غيض شلقها

خيل النزاهة ما ورا الغايب سباق=وان قابله فهو عليها صفقها

وقام يتمذلق قدام وجهك تمذلاق=واليا نشدت في جنب غيره لصقها

مطيته مطلاع تحدى وتنساق=وتركب عرو وان شد حمله وثقها

ومعمر روض التسالي له ارفاق=ترفع كباريها ويحفر نفقها

سبّاية الغرات قطّاعة الساق=اعراض خلق الله ليا غابت هتكها

وعشّيق للروضة مغرم ومشتاق=بئس العشيق وبئس باللي عشقها

مايلتهم لا التفت الساق بالساق=وتقسم الارزاق والله فرقها

احد يقدم له حميم وغساق=واحد بروضة سلسبيل وغدقها

ما قاله القايل الا بواد طقاق=لو صكت ابواب العرب ما طرقها

منقاد للعالم مقانيص وسباق=ثارت شوازنها وهدت سلقها

اهديت باقة ورد من ضمن الابواق=ولا اقول لحد خذها ولا اقول ذقها

تجيب الانفس كلها اصحاب واصداق=ولا اخشى عقايبها ولا ارجي مذقها

الآدمي لولا المكارم والأخلاق=كالحنظلة من عرقها ليا ورقها