القلب في نار المحبة فداوي

[الديوان]

للشاعر : خلف بن هذال العتيبي

القلب في نار المحبه فداوي=اما احترق والا انقطع فيـه معلوق

قلب ٍ كواه من المظانين كـاوي=بين الظلوع اللي على القلب من فوق

وانا اشهد ان الحب بلوى البلاوي=كم واحد ٍ قلبه من الحب محروق

يازيـن ماتعطـف وترحـم وتـاوي=فيمن فقد عقله بعـد هـزه الشـوق

ماله مجيب ولا طبيـب ٍ يـداوي=مستوحش ٍ كنه مقفـل بصندوق

من عقب حي ٍ راح كنه خـلاوي=ما كن يمشي وسط الاسواق مخلوق

يازيـن والله ماتفيد الشـكاوي=الرابح اللي ماله اليـوم معشوق

لو المنـاوي تنفـع اهـل المنـاوي=ما صار في قلبي حـزازات وفلـوق

اليوم صرت مـن التفـرق شقـاوي=حالي قضى واللي بقـى دم وعـروق

وليـا ذكرتـك ياعيون الـنداوي=اخذت لي مع هجعة الناس طـاروق

على فراق الشمل ماني بقـاوي=غصب ٍ علي وكل مطرود ملحوق

لابد بعـد البعـد جمـع نتساوي=ويصفي غرام اللي لهم بالحـب ذوق

وارعى الحيا حيـث ان قلبي حياوي=واخاف كرسي الحشا يلحقـه عـوق

ياعود ريحان ٍ على الحوض راوي=يزرق عليه من ازرق اليم زاروق

وان هزه النسناس ريحـه عـذاوي=واللي عليه ابواب ماهـو بمسروق

والرمش فوق محيجر العين ظـاوي=ليل ٍ سرى في جانبه رعد وبروق