اضحك وفلّ حجاجك

[الديوان]

اضحك وفلّ حجاجك اشفيك محزون=دنياك ماتسوى وخذها نصيحه

مادام مالك ميت ولا انت مديون=ارم الهموم وخل نفسك مريحه

لو كانوا اصحابك يضاهون مليون=نق الكفو منهم وخل السطيحه

ولا تشتكي للناس لوكنت مطعون=والذم من بعـض الخــلايــق مديحه

ولا تنحني للهم وتعيش مغبون=ترى المريح اهل العقول الصحيحه

لاصرت صادق قالوا الناس مجنون=مايمدحون الا النفوس القبيحه

وخلك صمود بوجه الايام دندون=وما حرم الله اثم لا تستبيحه

والكبر لو به فايده فاد فرعون=ومن ذاع سرّه بشّره بالفضيحه

والله لو يعطون لك مال قارون=ماشفت نفسك بالغنى مستريحه

انفض هموم القلب وابليس ملعون=وان ضاق صدرك ارض ربي فسيحه