فرحة اليتيم

[الديوان]

قصيدة الشاعر مشعان البراق على لسان يتيم



فرحت لك وأنا معاليقي حطام=والصدر من مافيه بيّح كنينه

فرحة يتيم ليلة العيد ما نام=خالاته ، وخواله .. مواعدينه

مواعدينه بشت .. وشماغ بسام=ويلـّعبونه في ملاهي المدينه

مانام .. وأحلامه تحراه قدام=كنه يطول أحلامه براحتينه

صبحه تجّلا نوره بعيد الاسلام=وقبل يروح المسجد : ملبسينه

صلى وجاء وأمر الله اللي قضى تام=ماهوب داري عنه زينه وشينه

بشته عليه .. مهندم خير هندام=واللي بعمره .. كلهم محترينه

رجع ولكن فرحته ضايعه دام=كل ٍ مشى وأخذ ولده بيمينه

صاروا خواله في نظر عينه أصنام=أحيوا بداخله الجروح الدفينه

ولا عنده إلا أمه وناب القهر سام=جاها يبي منها اليدين الأمينه

شعوره اللي حس به مثل الإلهام=وأول سؤال في باله : أبوي وينه

جته تعدي ماهو تخطي بالأقدام=وشالته بيديها وحبّت جبينه

أبوك : جاء البارح وقبل الفجر قام=وشرى لك ألعاب وهدايا ثمينه

لحظه وهو بين الحقايق والأوهام=والدمع الأزرق حاير في مقلتينه

يمه : ترى مانمت والعالم نيام=ماجاء .. ولا لمست يديني يدينه

مادام رقمه معك من بين الأرقام=بأكلمه ، يوم إنك تكلمينه

قالت بدون شعور وإدراك وإلمام=أبوك في تراب القبر دافنينه

العام مات .. ومت من موته العام=وكني بعد ما مات عني سجينه

أبوك جندي للوطن ضد الإجرام=عطاك عمره دون داره ودينه

كل ٍ عذلها بين عاتب ولوّام=تصبري خلي ضلوعك متينه

ماهو صحيح ان الضرورة لها أحكام=اكبر خطأ يوم انك تعلمينه

بكره تنسيّه الليالي والأيام=هو فيه أحد ينسى حدا والدينه؟

طير السعد في عالمه ما بعد حام=والله يعلم وش تخبي سنينه

انا كذا ساكت وصابر ومنضام=لكن كان الفرق بيني وبينه

الدمع لعيون الأرامل والأيتام=ودمع الرجل ذل وهوان وغبينه