باكر يجي من يطرق الباب ويهين..أختك ولو مليت بابك قفوله

[الديوان]

للي طلع من دون ما أشرح منين=للي يقول انه زعيم الرجوله

للي ادعاء انه بطل بالميادين!=للي يقول انه متعب خيوله

للي يسولف ويش سوى من سنين!=للي يقول احلها ومحلوله

للي يشوف الناس عنده صغيرين!=للي يقول ان العرب يلتجوله

للي رفع راسه ولايناظرك "شين"=للي كذب من شان شي ينوله

وش صار قولوا في قضية فلسطين؟=كم من زعيم ذبح ماحربوله

وش سوت الاسهم بكم يالقويين؟=وين الشجاعة يوم اعلن نزوله

من قوكم قسمكم (القرش) قسمين=قسم توفى وقسم يلحق ذلوله

الميت اليا مات نذكرة بالزين=ماقولة اقوال ماهيب قوله

وين الرجولة !! نطلع لناس ثانين=اللي ملك منصب كبير بدوله

ولانفع ربعه ويدري مساكين!=هل يعتبر هذا رجل من حمولة

باكر يموت ولا يجيله معزين=من شان غيره يعتبر لا حكوله

لاعاش من همه فلوس ودكاكين=ولاعاش من ساقة هواه وميوله

الحين نحكي عن فئه هانوا الدين=اللي يشوف المرجله في نعوله

اللي يغازل في بنات المسلمين!!=الوضع عادي ماخذه في سهوله

خوذي الرقم وانا اكلمك بعدين=واقابلك واخذ معك كم جوله

لامن نصحتة قال هي تفتن العين=شف مشيها متبرجه ومهبوله

ترضاها لختك ياخوي الشياطين؟=ياللي الشرف بيديك مثل العموله

((باكر يجي من يطرق الباب ويهين=أختك ولو مليت بابك قفوله))

يا أوصخ بشر بالمجتمع ياخسيسين=ياللي تحسبون المراجل بذوله

وبه ناس تهجر ربعها فوق عامين=من شانهم مرو ولا (زمروله)

سلام ياللي بالمساجد مصلين=سلام من قلبي ولو مادعوا له

سلام ياللي حبكم بالشرايين=سلام من طبق حديث لرسوله

قصيدتي لاتكثري بالعناويين=حماسنا واجه أوادم كسوله

عمري يبي ياصل ثلاثة وعشرين=وانا اتمنى الموت والا الطفوله

يا ((هم)) ياساكن فؤادي من سنين=كل الضلوع بداخلي استسلموا له

الادمي مثل الحجر طاقتة لين=يجيه ضغط وينتهي واحسبوا له

شاعر ولي أحساس وأحساس من وين؟=أحساس يصعب تاصله او تطوله

خلاص وقف ياقلم مشيك الحين=وش عاد باقي من كلام تقوله