علم العفا وعفاك ياوافي الكيل

[الديوان]

للشاعر : محمد الدحيمي الشهري


علم العفا وعفاك ياوافي الكيل=ابشرك بساطه في خير وعفا

نكفي بعضنا ونتكافى على الشيل=وللي تعب من الحط والشيل يكفا

من ذاق حر القايله يعشق الليل=ومن شب ضوه ليلة البرد يدفا

لاعاد ليل نمت به في حرى سهيل=وخايلت نو ٍ يخطف العين خطفا

امسيت في جيل ولاهوب بذا الجيل=اصبحت ولا ديرتي شبه منفا

كنا على فال الشحم والمعاميل=ونفوسنا انقى من نقى العد واصفى

وانا ولو راحت بقولة تساهيل=صلف وصروف الوقت تحتاج صلفا

ياترج جداني زحول الرجاجيل=يحرم فلا لي عنك ياترج مقفا

اما لطمنا العيل والا ألطم العيل=مدام شب النار مندوب الاطفا

خل ابرهه الاشرم على ذمة الفيل=وانظر لشي مايوصفه وصفا

ياذيل والله ماتجي راس ياذيل=علم ماهو يغبى ولا هوب يخفى

واللي حما بيته بطير ابابيل=ماجيتك ادور لمن صد واقفا

وماجيتك اطلب منك بن ولا هيل=جيتك وجرح الظلم غاديه يشفى

جيتك بكلمه كنها صعقة الويل=وان قلت تكفى لاتهاون بتكفى

تكفى تراها كلمة تقطم الحيل=لابالله الا تنسف الحيل نسفا

تكفى ماهي لمعقبين الفناجيل=تكفى لصلف وعادة القرم صلفا

تكفى ترا تكفى لها هدرة السيل=في صدر حر ينتف الطيب نتفا

تكفى ترا تكفى لها تسرج الخيل=وان كان لك في الخيل سرج وعسفا

تكفى تبين كل لاش وحلحيل=ثم تسمع لها بالصدر هبد ورجفا

تكفى وتكفى ماتساق لمهابيل=تكفى تخلي القرم لاش وهطفا

تكفى تجنبني هل القال والقيل=مانيب من يزبن على كل ملفى

تكفى تراني من قروم مشاكيل=حماية الساقه بسيف وشلفا

تكفى ترا تكفى تهز الرجاجيل=ولولا صروف الوقت ماقلت تكفى


http://www.youtube.com/watch?v=UweV0-DibT4