البارحة مدري وش اللي خذاني

[الديوان]

للشاعر : متعب التركي


البارحة مدري وش اللي خذاني=يوم اجنبوا عني من الضيقة اشملت

جيت أتكلم بس عيا لساني=ماكني إلا مرتكب ذنب واخملت

الله يسامح من ذكرت ونساني=وأنا أدري إني لاذكرته تجملت

عانيت وأدري كل طيب يعاني=وعلى حساب طعوني الخضر جاملت

ياماخذوا مني ولا احدأ عطاني=من طيبتي في حق نفسي تساهلت

عزاي لامنه تجهم زماني=يممت وجهي للكريم وتوسلت

واللي يبي قربي وبعدي لقاني=أمشي على وضح النقاء ما تختلت

يامن سكنت اجمل زوايا كياني=ياما على نفسي عشانك تحاملت

مرات احس انك معي شخص ثاني=ومرات احس انك حبيبي وما زلت

لاتفرح انك دجت بين المحاني=لو ماتخون الذاكره ما تسللت

عشان ماضيك الجميل وعشاني=حاول تشيل من الوفا ربع ماشلت

ماني على خبرك حبيبي تراني=حتى عن اصغار الاماني تنازلت