ديوان حلول البطالة - يالله يا غالب ولا انت بمغلوب

هذه القصيدة قالها الشاعر: يحيى بن شيبان في الشيخ : عبدالله بن مبارك العجمي
أثناء زيارته له في مستشفى الملك فهد التخصصي بالدمام
السبت 18-8-2018

يالله يا غــــالــــــب ولا انت بمغلـــــوب
يا واحـــــــدن تغــفــــر جميـــع الخطايا

يامرجعـــن يوسف على ابـــــوه يعقوب
واعطيت يوســــف من جــــزيل العطايا

البارحـــــة كني على النــــــار مصلوب
والكــــون ضيّـــــــق من جميع الزوايا

اصبحــــت لاكني من العقـــــل مسلوب
ونيـــــران قلبــــي تشتعــــــــل بالحنايا

اللي كتــــبه الله ع النـــــــاس مكتوب
كنك تشوفــــه في وجــــــــــيه المرايا

يابوفهد ياللي مــــــــع الناس محبوب
الله يجيـــرك من سهـــــــــــوم المنايا

الصاحب اللي ماذكِــــــر فيه عذروب
ذكـــره حميــــدن بين كل البــــــــرايا

يا فارجــــن لأيــــــوب يــارب أيوب
ترفـــــع عن العجمي جميـــع البلايا

يالله تغفــــر مابقـــى له من ذنـــوب
ياعالــــم اللي بالجهـــــر والخفــــايا

الناس في صوبن وانا همي بصوب
انقــــل همـــومـــك وانا فيــني بلايا

الثــــوب ياثقلــــه على متني الثوب
واطـــوي همومي مثل طي الطوايا

ينســـلّ قلبي كل ما غبـــت ويذوب
ياراس مالــــي بينهــــم والغــــــنايا

النفـــس عافت كل زادن ومشروب
الشكــــوى لله مــــا عليكــــم شكايا

انت عزيزن مالحق صــوبكم شوب
وقدرك رفيعـــن يا حسين الحــــلايا

والله ما اقصر خطوتي عنك واتوب
الا بمـــوتي لا ذكــــروا لك عــزايا

والختم صلــــــوا عد ما افترّ دالوب
على نبين هـــو شفيـــــع البــــــرايا

https://www.youtube.com/watch?v=CVETdzAx_tw