ديوان حلول البطالة - رثاء الوالدين

للشاعر : يحيى بن شيبان

يا منزل الاخلاص والفيل والتين=ومنزل سورة تبارك والانعام

يا ناصر الاسلام ويا ناصر الدين=ومتمم الاسلام بإركان الاسلام

يالواحد المعبود ما غيرك معين=يا الواحد اللي ما ذِكر عينك تنام

ياخالقن عبدك من تراب ومن طين=وابدعت في خلقه وتكوين الاجسام

تلطف بقلبن ذايقن لوعة البين=ترادفت بالجاش عامن ورى عام

النفس كنها بالحمم والبراكين=واصابع الرجلين من فوق الالغام

فقدت ابوي بعام سته وثمانين=وانا بعد سبعة وثمانين منظام

فوق النعش حطو وريث السلاطين=والواجب انهم نكسو روس الاعلام

يوم العزا عمري ثلاثة وعشرين=لو شفتني خمنتها بالمية عام

مدونن يوم العزا بالدواوين=لا عاده الله يوم من بد الايام

ضاق الفضا في ناظري والميادين=لأني دخلت بعالمن فيه الايتام

يا والدي من يوم موتك الى الحين=يمرني زولك سريعن بالاحلام

رغم البساطة موقفك موقفن زين=الجار عندك ما حصل يوم ينضام

يا كاسب الاحسان والبر واللين=لأميمتك شفتك مطيعن وخدام

قد شلتها وضميتها بالذراعين=وغسلتها من راسها لين الاقدام

اقولها عندي شهود وبراهين=موثقه بين القرايب والارحام

وين انت ياللي تجمع الناس كل حين=للضيف والعاني تحط روس الانعام

تمضي بي الايام وشهور وسنين=ما زلت أعد اني من إعداد الايتام

وفي عامي الثامن بعد عام الالفين=الحزن عوّد ماسحن كل الاحلام

فقدت والله جنتي والرياحين=مذكورة الجنة تحت ذيك الاقدام

ماكني الا فاقد اليوم ثنتين=كني فقدت الدين واركان الاسلام

يا اميمتي وشلون عنا تروحين=استغفر الله كان في هرجي آثام

لا والله الا صار للهم عشرين=عشرين باب مقفلات بالاحكام

لولاي ادّله خاطري بالبزارين=يمحل فؤادي ما بقى فيه رمرام

يالعبد لك يومن به تدان وتدين=وتحصد اللي تزرعه يدك العام

اخفض جناح الذل ما غير لأثنين=ومن بينهم خلك ذليلن وخدام

يالموت لك هيبه تهيب السلاطين=واهابها هيبة ذليلن ومنضام

لولا البدع لا سوي اليوم تأبين=لأغلى مخاليقن على دور الاعوام

اعوذ بالله من حضور الشياطين=ومن الكلام اللي يسطر بالاقلام

يارب انا عبدك ومخلوق من طين=اغفر خطاي ان كان تلحقني آثام

والختم صلى الله على ناصر الدين=اللي نقذنا من تماثيل واصنام

https://www.youtube.com/watch?v=iYAi7ZT_RTc

قناة الشاعر على التيك توك

https://www.tiktok.com/@shiban84