ديوان حلول البطالة

قِم تلفت دون ما تصدر كلام=عِد ربعك كم فيهم طيبين

لا يغرك لو يزيد الاهتمام=بـِد يوم ٍ فيه عنك مدبرين

لا يغرك كثرهم والازدحام=لو جنوب ٍ رحت راحو مشملين

والله اني قبل عهد الاحتلام=اقيم الرجال من نظرات عين

قبل ذاك اليوم عضيت البهام=محسن النيات في شخص ٍ رزين

كنت اماري كنت اقول انه سنام=وخابت الهقوات في عرق الوتين

لو وزنت الرجل وزن ٍ بالجرام=ما ارتفع بالوزن لو انه سمين

يرتفع بالعين من هو بالانام=بعد رب البيت له وقفة معين

فيه رجال ٍ ما تعد الا ركام=وفيه رجال ٍ بالمواقف ثابتين

فيه رجال صدورها ضد السهام=بالمواقف كلهم درع ٍ حصين

كل منهم خابرينه ما يضام=وعادة للحر يندى له جبين

تحسب العدوى تجيك من الجذام=ما تجيك الا من الشخص اللعين

ان دخل في مجلس ٍ صار انقسام=في لسانه دوم شر المسلمين

مثل هذا جعل تاتيه السهام=والمنايا تطلبه في كل حين

جعل عوده ينصرم قبل الصرام=جعل ماله فوق وجه الارض عين

خابرين الكلب ذيله ما استقام=لو يعود العود بالدنيا جنين

وانت خلك حذر يا ولد الكرام=من سليط ٍ يشتكي منه القرين

الشاعر : يحيى بن شيبان

https://www.youtube.com/watch?v=553px4Iz9ZA

https://www2.0zz0.com/2025/03/11/15/432712517.png