الشاعر : احمد بن عبدالرحمن العريفي
ياسعود تكفـى لايفكون الاطناب=ياسعود تكفى قلهم بس ليله
نفسي تشلع كل ماشلع منساب=طواري الفرقا علينا ثقيله
يومٍ طويتـوا فرشكـم خافقـي ذاب=كن الضماير وسط حر المليله
ياسعود شفي من هوى البر ماطاب=خلوا حبيـس الدار يبرد غليله
يكفيه من طول السنه صكت الباب=ويكفيه من طول السنين المحيله
خلوه يسلى عن همومه والاتعاب=ويسج رجله بالفياض الظليله
والصبح يشرف له على راس مرقاب=ويشم ريح الشيح وسط الخميله
خميلةٍ خضرا تقل مابها تراب=فيها الزبيدي مثل روس النثيله
وريح البختري والنفل مثل الاطياب=تنعش قلوب ٍ بالحنايا عليله
وبالليل حول النار تلتم الاصحاب=وتبدا السوالف والعلوم الجميله
وكن الكواكب فوقنا والقمر غاب=جمرٍ تنثر في مهب المسيله
وماحلى الصبا لجت مع الصبح تنساب=يحوشها ضوح الفجرفـي شليله
بالبر نسلى عن هوى تلع الارقـاب=اللي على شوفه نسوق الجليله
ونسلى عن هموم المدينه والانشاب=ونرتاح من بعض النفوس الرزيله
يالله طلبتـك يالولي رب الارباب=تديم انعامٍ علينا جزيله
وتغفر ذنوب اللي من الذنب قد تاب=يـارب وفقنا لدرب الفضيله
والخاتمه صلوا على سيد الاحباب=رسول رب البيت راعي الوسيله