هملتني حيل يوم ان كنت محتاجك

[الديوان]

 للشاعر :عبدالرحمن معيض


ياتايه الحس لاترخي لي حجاجـك=مليت زيف الغنج من كثـر مامـره

هملتني حيل يوم ان كنت محتاجك=مشغـول ماكنـك الا عالـم الـذره

خذاك مني دجاك ولـون ديباجـك=وخذاك طيف الغرور وطيحت الغره

رسمت ليل الجفا رسمك لمكياجـك=على ضلوع بدوي مره ورى مـره

متني مساحة عفو والعذركرباجـك=ادمح خطاياك وانت تعـاود الكـره

كم جيت وارد على جمك وهداجـك=افتح خفوقي ضما ويدينـك تـزره

احفيت رجل العنا وقفيت بأسراجك=تمشي وغصن الوفا وراك مجتـره

قفلت بابك عبث واحكمت مزلاجـك=وسلكت درب الفراق وصار لك جره

واليوم اشوفك معود تسحب ادراجك=مكسور ودك تعيد الوقـت وتفـره

ماعاد يمديك ريحنا مـن ازعاجـك=ضيقة خفوقي تشابه قهوتي مـره

خلك مع الغره اللي غطت احجاجك=ولاعاد يطري عليك الخافق تمـره