للشاعر : حمد المغلوث رحمه الله
يا رب صبرني على امرك وبلواك .. واجبرعزا من شاف ضيم العزاير
مثل الدريك اللي على حوض الادراك .. يبكي ودمعه فوق الأوجان جاير
يا عين هلي ذارف الدمع سفاك .. وابكي وهاتي ما خفا من عباير
يا عين لا تبكين هذا ولا ذاك .. الا ولا فرقا الأهل والعشاير
ابكي على سمح النبا حسـن الاسلاك .. اللي عليه مغوزر الدمع فاير
قلبي عليه من الولع فيه دكاك .. والحال مني خلصت بالحساير
كني ربيـط الروم في وسـط شباك .. ولا كسيـرٍموجعته الجباير
قدم العرب غادي بشـوش ٍ وضحاك .. والكبد يصلاها لهيب السعاير
يالله يا والي تصاريف الافلاك .. يا مطفيٍ نارالسنين العساير
يا من لعسرات الشرابيك فكاك .. والي السماء والي جميع البصاير
اسألك مـن جودك وفضلـك وحسناك .. تجمع بشملي مع ظبي الزباير
الجادل اللي يصقل السن بالراك .. حاوي محاسن محصنات الخداير
سبه عزاي وصار للروح ملاك .. وارخصـت له عمري وما بالذخاير
يا زيـن روحي يا أريش العين تفداك .. حيثك هواي وعن هوى الغير ذاير
علــّي نذر ٍ إن ولف الله بلاماك .. لا رزّ رايات الفرح والبشاير
واصوم لله ما تيسر لعيناك .. وابني لحبك بالضماير مناير
يا زين يا عذب اللما كيف بنساك .. والحب سلطانه على الحال جاير
يا مورد الخدين محلى سجاياك .. يا سيد كلّ المترفات النضاير
يا زين شفني من غرامك وفرقاك .. كني على جالٍ من اليام هاير
سهـرٍّ ونوح بنوح ورقٍ على الراك .. معذا تصفقني ركون العواير
يا بو محمد يا فتى الجُود بنخاك .. يا فرحة المضيوم يوم الكساير
شف لي طبيب ٍ شاطرٍ لاعدمناك .. كوده يداوي علةٍ بالضماير
والا فنا يا معدن الجُـود وياك .. نركب على ثنتين عوصٍ حراير
نركب عليهن يا فتـى وقت الامساك .. من دار أبو جابرعزيز القصاير
والعصرحول مريـخ وبيمة اشياك .. ومنكبين المزهره والنقاير
يا بعد والله يا القعيمي معشاك .. ان سلم الله مردمات القفاير
يومين والثالث على الهون ملفاك .. هجر منازل من له القلب طاير
فيلا لقينا ديرة الربع ذولاك .. الوصل يطفي ما لجا من زفاير
وامسي لكني مالكٍ كلّ الاملاك .. املاك سلطان البحر والجزاير
والى لفينا دافع الله مناياك .. مرخوص يا مروي السيوف الشطاير
الا ان يطيب الكيف لك فانت برضاك .. اتم انا وياك للحول داير
عند السياسب لابةٍ مثل شرواك .. الكل منهم يحتمل بالخساير
اهل دلال كالغرانيق ودكك .. وحِيلٍّ تقلط للوجيه السفاير
يا بو محمد عانك الله وعافاك .. وذراك ربي من حتوف الدواير
شفني من الفرقا ولا الحال يخفاك .. مثل المريض انهض ولانيب ثاير
من فقد طفل ٍ للمعاليق مساك .. الجادل اللي مايدوس الوزاير
كامل تواصيفه ولا هوب حشاك .. الا ولا يومٍ لقيته مكاير
منزهٍ عرضة ولاهوب دكاك .. بالشين حاشا ما سمع شور شاير
من صلب شغمومٍ ضحى الكون سفاك .. لأدمى العدى يوم اشتعال الذخاير
سمحٍ سلوكي ولا هوب شكاك .. ومغفلّ ما هوب راعي عباير
ربي كساه من المحاسن والابراك .. ثوب الجمال وكمّله بالستاير
الخد كالقنديل واللحظ فتاك .. يغري الضماير والذوايب حداير
متعثكلاتٍ يسهجن روس الاوراك .. مثل الدجى فوق الردايف نثاير
علمي بشوفه يوم الاثنين هذاك .. قبل المديد بعشرة أيام زاير
سَلّـم علي وقال بالك و حذراك .. تفضي السدود ولو تشوف النكاير
واعرف ترى ما لي عزى عن ملاماك .. الله يبور بملزمة كل باير
لياك تطريني ولا جِيب طرياك .. عند العرب والله عليم السراير
وارجي عسى ربٍّ بلانا بهذاك .. اللي وداده في حشا الروح صاير
يجمع بشملي بأريش العين وهناك .. هالعمر خيره لو بقى للوداير
والختم صلى الله على المصطفى ذاك .. محمد المبعوث ما سار ساير
يا رب صبرني على امرك وبلواك
العرض العادي
